കായലിന്‍റെ ഓളവും തീരവും തഴുകി കെട്ടുവള്ളത്തിൽ ഒരു യാത്ര... കിടിലൻ റൂട്ടുകളിതാ!

ആലപ്പുഴ

കേരളത്തിലെ കായൽ കെട്ടുവള്ള യാത്രകൾക്ക് പുത്തൻ മാനവും രൂപവും നല്കിയ ആലപ്പുഴ കേരളത്തിൽ ഏറ്റവും സ്വീകാര്യതയും പ്രശസ്തിയുമുള്ള കായൽ യാത്രയാണ്. ഉൾനാടൻ ജലഗതാഗതത്തിലും വിനോദസഞ്ചാരത്തിലും ആലപ്പുഴയോളം പ്രശസ്തിയും പെരുമയും കേരളത്തിലെ മറ്റൊരു നാടിനും അവകാശപ്പെടുവാനില്ല. കായൽയാത്രകളിലെ റാണിയാണ് ആലപ്പുഴ. ശാന്തവും റൊമാന്‍റിക്കും ആയ ഒരു അവധിദിനം ഏറ്റവും മികച്ച രീതിയിൽ ചിലവഴിക്കുവാൻ ഇതിനോളം മികച്ച സ്ഥലമില്ല. കായലിലെ നീണ്ട യാത്രകൾ മാത്രമല്ല, രുചികരമായ, നേരിട്ട് കായലിൽ നിന്നു പിടിച്ച് കറിവെച്ച മീനും കൂട്ടിയുള്ള ഭക്ഷണവും യാത്രകളിൽ ലഭിക്കും.

കുട്ടനാട്

കുട്ടനാട് എന്നു കേൾക്കുമ്പോൾ തന്നെ പാടങ്ങളും കെട്ടുവള്ളങ്ങളുമാണ് നമ്മുടെ ഓർമ്മയിലെത്തുന്നത്. പ്രകൃതിമനോഹരമായ കായലിലൂടെ മണിക്കൂറുകൾ ഹൗസ്ബോട്ടിൽ ചിലവഴിക്കുക എന്നത് ചെറിയ കാര്യമേയല്ല. അതും കുട്ടനാട് പോലെയുള്ള പ്രദേശത്തിന്‍റെ ഭംഗിയും സൗന്ദര്യവും ആസ്വദിച്ചുള്ള യാത്ര ജീവിതത്തിലെന്നും ഓർത്തിരിക്കുവാൻ പാകത്തിലൂള്ളതാവും. കോട്ടയത്തെ കോടിമത ബോട്ട് ജെട്ടിയിൽ നിന്നും ആരംഭിക്കുന്ന യാത്ര, ആലപ്പുഴ വഴിയാണ് പോകുന്നത്. ഈ യാത്രയിലുടനീളം ഒരുപാട് കാഴ്ചകളും ജീവിതങ്ങളും നിങ്ങളെ കാത്തിരിക്കുന്നുണ്ട്.

വലിയ പറമ്പ, കാസർകോഡ്

കാസർകോഡുകാർക്കു മാത്രമല്ല, മലബാറുകാർക്ക് മൊത്തത്തിൽ ഒരു ആലപ്പുഴ ഫീൽ നല്കുന്ന ഇടമാണ് നീലേശ്വരത്തിനു സമീപത്തുള്ള വലിയപറമ്പ. വളരെ അലസമായി ഇരിക്കുമ്പോൾ പോകുവാനും ആവേശത്തിൽ തിരികെ വരുവാനും പറ്റിയ ഒരു സ്ഥലമാണിത്. ഇരുവശവും തെങ്ങിൻതോപ്പുകൾ നിറഞ്ഞു നിൽക്കുന്ന കായലിലൂടെ മണിക്കൂറുകൾ കെട്ടുവള്ളത്തിൽ ചിലവഴിക്കാം, നിങ്ങൾ തിരഞ്ഞെടുക്കുന്ന പാക്കേജ് അനുസരിച്ച് കേരള സദ്യ ഉള്‍പ്പെടെയുള്ള കാര്യങ്ങളും ഉൾപ്പെടുത്താം.

തിരുവനന്തപുരം

തിരുവനന്തപുരത്ത് ഒരു കായൽയാത്ര എവിടെ നടത്തുമെന്നാണോ ആലോചിക്കുന്നത്. നേരെ തിരുവല്ലത്തിനു പോരെ. വേളിയിലൂടെ കടന്നുപോകുന്ന തിരുവല്ലം ഇവിടുത്തെ കായൽ യാത്രാനുഭവത്തിന് പറ്റിയ ഇടമാണ്. തിരുവനന്തപുരം നഗരത്തിൽ നിന്നും വെറും ആറ് കിലോമീറ്റർ ദൂരം മാത്രമേയുള്ളൂ എന്നതും ഒരു പ്രത്യേകതയാണ്.

കോഴിക്കോട്

കോഴിക്കോട് കായൽ യാത്രകൾ മെല്ലെ പ്രസിദ്ധിനേടി വരുന്നതേയുള്ളൂ. കല്ലായി നദിയിലെയും കനോലി കാനിലെയും സർവീസുകൾ നിങ്ങൾക്ക് കോഴിക്കോട് യാത്രയിൽ പ്രയോജനപ്പെടുത്താം. വാട്ടർ ടൂറിസത്തിന് കടലുണ്ടിയിൽ ചാലിയാർ നദിയും പ്രസിദ്ധമാണ്. ഭാവിയിൽ ജലഗതാഗത രംഗത്ത് മുന്നേറുവാൻ പോകുന്ന ഇടമാണ് കോഴിക്കോട്.

കൊല്ലം

ജലഗതാഗത രംഗത്ത് വൻ സംഭാവനകൾ നല്കിക്കൊണ്ടിരിക്കുന്ന സ്ഥലമാണ് കൊല്ലം. അഷ്ടമുടി കാൽ മാത്രം മതി കൊല്ലത്തിന്റെ ഗരിമ ഉയർത്തുവാൻ. ഉൾനാടൻ ജലഗതാഗതത്തിന്റെ വ്യത്യസ്തമായ മാനങ്ങൾ കാണിച്ചുതരുന്ന മൺറോ തുരുത്ത്, സാധിക്കുമെങ്കിൽ കണ്ടിരിക്കേണ്ട സ്ഥലമാണ്. ഭക്ഷണമാണ് കൊല്ലം യാത്രയിൽ ആസ്വദിക്കുവാൻ പറ്റിയ മറ്റൊരു കാര്യം.

കൊച്ചി

വൈവിധ്യമാർന്ന അനുഭവങ്ങളാണ് വിനോദസഞ്ചാരികൾക്ക് മുന്നിൽ കൊച്ചി നല്കുന്നത്. അതിലൊന്ന് ഇവിടുത്തെ ജലഗതാഗതമാണ്. വേമ്പനാട് കായലിന്റെ തീരത്തു നിന്നാരംഭിക്കുന്ന യാത്രയിൽ ഒരുപാട് കാഴ്ചകൾ കാണാം. പരമ്പരാഗത മത്സ്യബന്ധന വലകളും ആകർഷകമായ തടാകങ്ങളും ഇതില് കാണാം.